Rithöfundalest(ur) 2022

Austfirskir höfundar fylla lestina í ár

Rithöfundar verða á ferð um Austurland 17. - 20. nóvember að kynna verk sín venju samkvæmt. Að þessu sinni verður Rithöfundalestin alfarið austfirsk þar sem allir höfundar eiga rætur eða eru búsettir á Austurlandi. Kjarna lestarinnar mynda fjórmenningarnir: Benný Sif Ísleifsdóttir með skáldsöguna Gratíana sem er framhald Hansdætra; Jónas Reynir Gunnarsson með skáldsöguna Kákasus-gerillinn; Smári Geirsson með stórvirkið Sögu Fáskrúðsfjarðar; og Ragnar Ingi Aðalsteinsson með þrjú verk, Líkið er fundið - sögur af Jökuldal, kvæðasafn systkinanna frá Heiðarseli og bók um Skáld-Rósu. Aðrir höfundar sem stíga um borð í lestina á mismunandi stöðum eru: Unnur Sveinsdóttir með barnabókina Skotti og sáttmálinn; Ásgeir Hvítaskáld með skáldsögu byggða á sönnum atburðum, Morðið í Naphorni; ; Jón Pálsson með glæpasöguna Skaðræði; Jón Knútur Ásmundsson með ljóðabókina Stím; Anna Karen Marinósdóttir með ljóðabókina Kannski verður allt í lagi; og Björn Ingvarsson með þýðingar á ljóðum Inúíta.

Upplestrarsamkomur Rithöfundalestarinnar verða sem hér segir:

Allir velkomnir á meðan húsrúm leyfir.

 

Rithöfundalestin er samstarfsverkefni Gunnarsstofnunar, Skaftfells, Menningarstofu Fjarðabyggðar, menningarsviðs Múlaþings og menningar- og atvinnumálanefndar Vopnafjarðarhrepps.

Verkefnið nýtur stuðnings Uppbyggingarsjóðs Austurlands, Síldarvinnslunnar, Alcoa, Atlantsolíu, Brims, Forlagsins, Bílaleigu Akureyrar og Gistihússins á Egilsstöðum.

Allar upplýsingar um viðburðina er að finna á Facebook-síðum samtarfsaðilanna.

Úthlutun Menningarsjóðs 2022

Menningarsjóður Gunnarsstofnunar auglýsti í vor eftir umsóknum með sérstaka áherslu á list- og miðlunarverkefni tengd austfirskum menningararfi og verkefni tengd ritverkum og ævi Gunnars Gunnarssonar. Stjórn sjóðsins hefur tekið ákvörðun um úthlutun og eftirtalin verkefni hljóta styrki:

  • Þýðing Aðventu yfir á hebresku til útgáfu í Ísrael, 400 þús. kr.
  • Norsk þýðing og útgáfa á 12 smásögum Gunnars Gunnarssonar, 400 þús. kr.
  • Hnikun - bókverk tengt sýningu í Sláturhúsinu á Egilsstöðum þar sem unnið er með sögu hússins, 300 þús. kr.
  • „Dwelling on the banks of Jökla“ - könnun á sambandi mannfólks og ómennskrar náttúru við Jöklu, 100 þús. kr.

Jafnframt veitir sjóðurinn Gunnarsstofnun styrk vegna nýrrar miðlunar á Skriðuklaustri til að koma Ugga litla Greipssyni úr Fjallkirkjunni yfir í viðaukinn veruleika (AR). Heildarúthlutun úr Menningarsjóði Gunnarsstofnunar þetta árið nemur 2,2 m.kr.

Sjá nánar um úthlutunina hér.

Einu sinni var...í framtíðinni - stefnumót um stafræna miðlun

Stefnumót um stafræna miðlun og varðveislu menningararfs verður haldið í Reykjavík 16. júní 2022, í Veröld - húsi Vigdísar, Háskóla Íslands. Á stefnumótinu verða flutt erindi um stafrænan menningararf og framtíð arfleifðarinnar í sýndarheimum rædd í málstofum af um 30 innlendum og erlendum fyrirlesurum. Jafnframt mun gestum gefast tækifæri til að kynna sér um 20 tæknilausnir og afrakstur verkefna á þessu sviði, sem og nýsköpun eins og leiki, sýndarveruleika og upplifun byggða á menningararfinum. 

Stefnumótið er lokaviðburður í verkefninu PHIVE (Promoting and preserving heritage in virtual environments) sem er samstarfsverkefni stutt af Norðurslóðaáætlun ESB og leitt af Gunnarsstofnun á Skriðuklaustri. Viðburðinum verður streymt og hægt verður að taka þátt gegnum netið. Skráning á stefnumótið fer fram á Eventbrite og er sætafjöldi takmarkaður. Hægt er að sækja heildardagskrána hér.

Sjá nánar um ráðstefnuna og PHIVE verkefnið hér:

https://northernheritage.org/final-conference-program/

Ráðstefnan er skipulögð af eftirtöldum íslenskum aðilum:

isl samstarf

Gestadvöl í Slóvakíu fyrir rithöfunda og þýðendur

Gunnarsstofnun á Skriðuklaustri í samstarfið við Rithöfundasamband Íslands, Tou Scene menningarmiðstöðin í Stafangri í Noregi og Literary Residencies Kosice í Slóvakíu bjóða rithöfundum og þýðendum frá Íslandi og Noregi að sækja um dvöl í gestaíbúð í Kosice í Slóvakíu á tímabilinu júlí 2022 til október 2023. Áhugasamir eru beðnir um að fylla út rafrænt umsóknareyðublað (á ensku) og senda inn umsókn fyrir 15. júní 2022.

Epic Residencies verkefnið er opið fyrir alla höfunda, sama með hvaða bókmenntaform þeir vinna (prósa, ljóð, ritgerðir, tilraunaskrif, handritsgerð o.s.frv.), sem og þýðendur. Verkefnið heldur í heiðri gildum fjölmenningarlegra samskipta, kynjajafnréttis og mikilvægi þess að reynsla minnihlutahópa og margbreytileiki skili sér inn í bókmenntir.

Í boði eru fjögur pláss fyrir höfunda frá Íslandi og fjögur pláss fyrir höfunda frá Noregi.  Verkefnið Epic Residencies býður höfundum frá Íslandi, Noregi og Slóvakíu tækifæri til að stunda ritstörf, óháð, kyni, uppruna eða tungumáli. Literary residencies Kosice verkefnið hefur umsjón með móttöku höfundanna.

Þeir sem hljóta dvöl í Kosice munu fá:

  • Einstaklingsíbúð með sérbaði og eldhúsi í gamla bænum í Kosice.
  • Dvalarstyrk upp á 1.500 evrur.
  • Ferðastyrk til að dekka kostnað við ferðir til og frá Slóvakíu.
  • Frían aðgang að kvikmyndahúsinu Kino Úsmev og rithöfundasafni Sándor Márai.
  • Stuðning og aðstoð meðan á dvölinni stendur frá Literary Residencies Kosice.
  • (Ferða- og sjúkratryggingar eru ekki innifaldar í dvalarstyrk og á ábyrgð þeirra sem koma.)

Hæfniviðmið

Dvölin í Kosice er opin fyrir höfunda sem:

  • Búa, starfa, fæddust í eða hafa aðrar tengingar við Ísland og Noreg burtséð frá aldri, kyni og kynþætti.
  • Skapa eða þýða bókmenntaverk.
  • Geta tjáð sig á ensku í töluðu og skrifuðu máli, sem er æskilegt vegna samskipta.

Literary Residencies Kosice er nýtt gestaíbúðarverkefni í Slóvakíu. Það er til húsa í menningarsögulegri byggingu frá 18.  öld í gamla miðbænum í Kosice. Í sömu byggingu er rithöfundasafn helgað ungverska höfundinum Sándor Márai og bróður hans kvikmyndaleikstjóranum Géza Radványi, en húsið var í eigu fjölskyldu þeirra. Gestaíbúðaverkefninu var komið á fót af Félagi minnihlutahópa, sem hefur aðsetur í byggingunni, og hópi ungra höfunda og menningarfrömuða sem stýra bókmenntaviðburðum í nærliggjandi kvikmyndahúsi, Kino Úsmev. Verkefnið er í samstarfi við Miðstöð bókmennta í Slóvakíu (LIC) sem og smærri menningarverkefni og hópa vítt og breitt um landið. Unnið er bæði með þekktum höfundum og upprennandi skáldum.

Verkefnið Epic Residencies er afrakstur samstarfs þriggja aðila sem reka gestaíbúðir: Gunnarsstofnunar á Skriðuklaustri, Tou Scene menningarmiðstöðvarinnar í Stafangri og hins nýstofnaða Literary residencies Kosice í Slóvakíu. Markmið verkefnisins er að tengja saman bókmenntir Íslands, Noregs og Slóvakíu með samskiptum og dvöl fyrir höfunda og þýðendur í löndunum þremur. Á árunum 2022 til 2023 munu samtals átta einstaklingar frá Íslandi og Noregi (fjórir frá hvoru landi) dvelja í Kosice í Slóvakíu. Og á sama tíma munu átta höfunda eða þýðendur frá Slóvakíu dvelja á Íslandi og í Noregi (fjórir í hvoru landi). Samstarfsverkefnið er fjármagnað með stuðningi frá Uppbyggingarsjóði EES.

Umsóknareyðublaðið

Frestur til að skila inn umsóknum er til 15. júní 2022. Umsóknareyðublaðið er á netinu (á ensku) og nauðsynlegt að senda með því eftirfarandi viðhengi:

  • Stutta ferilskrá (CV) með yfirliti um útgáfur og annað efni
  • Lýsingu (á ensku) á að hverju viðkomandi hyggst vinna meðan á dvölinni stendur (½ - 2 A4 síður)
  • Sýnishorn af verki sem ætlunin er að þróa áfram eða skyldu verki (að hámarki 10 síðu á upprunalegu máli) helst á ensku (á formi docx, pdf eða með nethlekk). Ef um er að ræða þýðingu þá samsvarandi sýnishorn af þýddum verkum.

Vinsamlega fylltu út umsóknareyðublaðið hér

Afgreiðsla umsókna

Umsóknin verður tekin til umfjöllunar af hópi sérfræðinga frá samstarfsaðilunum í löndunum þremur. Umsækjendur munu fá svör send í tölvupósti fyrir 15. júlí 2022.

Stuðningur Uppbyggingarsjóðs EES

Epic Residencies verkefnið nýtur 150.000 evra styrks frá Íslandi, Lichtenstein og Noregi gegnum Uppbyggingarsjóð EES. Verkefnið nýtur einnig 22.000 evra mótframlags frá ríkissjóði Slóvakíu. Markmið verkefnisins er að auka hæfni þeirra stofnana sem að því standa, fjölmenningarleg samskipti, jafningjafræðsla og þekkingaryfirfærsla. Frekari upplýsingar um verkefni sem njóta stuðning Uppbyggingarsjóðs EES í Slóvakíu er að finna á www.eeagrants.sk. Öll verkefni njóta 15% mótframlags slóvakíska ríkisins.

Styrkir Uppbyggingarsjóðs EES endurspegla framlög Íslands, Lichtenstein og Noregs til grænni, samkeppnishæfari og samstarfseflandi Evrópu. Tvö yfirliggjandi markmið eru: að stuðla að félagslegum og fjárhagslegum jöfnuði innan Evrópu og að styrkja tvíhliða samstarf milli stuðningsríkjanna og fimmtán landa við Eystrasaltið og í Mið- og Suður-Evrópu. Stuðningsríkin þrjú vinna náið með Evrópusambandinu gegnum samninginn um Evrópska efnahagssvæðið (EES). #SPOLOCNEzaDOBREnapady #EEAgrants #EPICRESIDENCIES

 ILN slovak

Menningarsjóður Gunnarsstofnunar auglýsir eftir umsóknum

Menningarsjóður Gunnarsstofnunar hefur tvíþættan tilgang: að renna stoðum undir starfsemi Stofnunar Gunnars Gunnarssonar á Skriðuklaustri með árlegum framlögum; og að styðja rithöfunda, listamenn, fræðimenn og námsfólk til verka er samræmast hlutverki Gunnarsstofnunar. 

Stjórn sjóðsins hefur ákveðið að árið 2022 verði áhersla lögð á:

  • List- og miðlunarverkefni sem tengjast austfirskum menningararfi.
  • Verkefni sem tengjast ritverkum og ævi Gunnars Gunnarssonar.

Umsóknarfrestur er til miðnættis 5. maí 2022. Umsóknum ásamt fylgiskjölum skal skila rafrænt á This email address is being protected from spambots. You need JavaScript enabled to view it..

Hægt er að nálgast úthlutunarreglur og umsóknareyðublað á www.skriduklaustur.is/gunnarsstofnun/menningarsjodurásamt frekari upplýsingum um sjóðinn.

Hafðu samband

  • This email address is being protected from spambots. You need JavaScript enabled to view it.

Komdu í heimsókn

Fylgdu okkur