Laugardaginn 26. maí verður opnuð sýning um miðaldaklaustrið að Skriðu. Á sýningunni er fjallað um sögu klaustursins og rannsókn síðustu tíu ára á minjum þess. Meðal muna á sýningunni eru gripir frá Þjóðminjasafninu sem tengjast klaustrinu, s.s. Maríulíkneski, kaleikur og patína og nisti. Þá verður frumsýnt tölvugert þrívíddarlíkan af kirkju og klausturhúsum eins og þau gætu hafa litið út fyrir 500 árum. Allir velkomnir á opnun kl. 14.

Dagurinn í dag, 18. maí, er fæðingardagur Gunnars Gunnarssonar. Í ár eru liðin 123 ár frá fæðingu hans. Í ár verða einnig liðin 100 ár frá útgáfu á fyrstu skáldsögu hans, sögunni af fólkinu á Borg. Landsbókasafn Íslands - Háskólabókasafn hefur gert fyrstu útgáfu Borgarættarinnar á íslensku aðgengilega á www.baekur.is í tengslum við verkefni sem snýst um að miðla evrópskum menningararfi rafrænt. Úr ættarsögu Borgarfólksins hét þetta fjögurra binda verk í þýðingu Jakobs Jóhannessonar Smára þegar það kom út á árunum 1915-1918.

Sumarið er komið í dalinn. Mispillinn við Gunnarshús farinn að grænka og fuglasöngur fyllir loftið. Í dag er 1. maí og það þýðir að sumaropnun er hafin. Fram í miðjan september verður opið daglega á Skriðuklaustri. Í maí er opið kl. 12-17 en síðan lengist opnunartíminn 1. júní í kl. 10-18. Sýningin Flæði eftir Lóu er í gallerí Klaustri og í stássstofu er Lagarfljótsormurinn á kreiki. Klausturkaffi býður upp á veitingar í hádegi og kaffi og um helgar er hádegis- og kaffihlaðborð.

Út er komin hjá Sölku ljósmyndabókin Aðventa á Fjöllum eftir Sigurjón Pétursson og Þóru Hrönn Njálsdóttur. Bókin er afrakstur ljósmyndaverkefnis þeirra hjóna sem var innblásið af Aðventu Gunnars Gunnarssonar. Í bókinni eru óviðjafnanlegar vetrarmyndir af söguslóðum Aðventu og myndir úr Sæluhúsinu við Jökulsá sem Fjalla-Bensi gisti í á ferðum sínum um Mývatnsöræfin. Ljósmyndirnar voru fyrst sýndar á sýningu á Skriðuklaustri í nóvember og desember en eru nú á sýningu í Þjóðminjasafninu sem var opnuð 21. apríl sl. Salka gefur bókina út á íslensku, ensku og þýsku. Sjá nánar á heimasíðu Sölku og góða umfjöllun í Kiljunni 18. apríl. Gunnarsstofnun og Menningarráð Austurlands studdu ljósmyndaverkefnið ásamt Þjóðminjasafninu.