Melarétt hefur verið frestað til sunnudagsins 23. sept. Sökum þess snýst auglýstur opnnartími við um helgina og opið verður á laugardag kl. 12-17 en kl. 14-17 á sunnudag. Síðasta hádegisverðarhlaðborð Klausturkaffis verður því á laugardag en kaffihlaðborð báða daga.

Þá er haustið gengið í garð og ekki opið lengur upp á hvern dag á Skriðuklaustri. Um helgina verður þó opið og er það síðasta opnunarhelgi fyrir haustdvala. Opið verður á laugardag kl. 14-17 en þá er réttað í Melarétt kl. 11.30-14. Á sunnudaginn verður opið kl. 12-17. Kaffihlaðborð og hádegishlaðborð verða hjá Klausturkaffi en einnig er rétt að minna á að þetta eru síðustu forvöð til að sjá sýninguna Undir Klausturhæð, sýningu um miðaldaklaustrið. Þeir sem ekki eru þegar búnir að skoða minjasvæði eftir formlega opnun þess geta að sjálfsögðu skoðað það áfram inn í haustið þó að ekki sé opið  í Gunnarshúsi og Snæfellsstofa verður einnig opin út september kl. 10-16 virka daga og kl. 13-17 um helgar. Þá er rétt að minna á að lomber vetrarins hefst nk. föstudagskvöld á Skriðuklaustri og verður spilað frá kl. 20.00.

Í dag er útgáfudagur frímerkis sem Íslandspóstur gefur út í tilefni 500 ára vígsluafmælis klausturkirkjunnar að Skriðu í Fljótsdal. Á frímerkinu er teikning af grunnformi klausturbygginga á Skriðuklaustri. Þá eru á fyrsta dags umslagi ljósmyndir af nokkrum merkum munum sem fundust við fornleifarannsóknina sem stóð frá 2002 til 2012. Frímerkið hefur hátt verðgildi og er fyrir 1500 gramma sendingar. Hægt er að fræðast meira um útgáfuna á vefsíðu Póstsins.

Opnuð hefur verið ný sýning í gallerí Klaustri. Það er indversk bandaríski listamaðurinn Bivas Chaudhuri sem sýnir þar verk sem hann hefur unnið á Skriðuklaustri sl. vikur. Chaudhuri er fæddur í Kalkútta á Indlandi og nam þar myndlist en flutti í lok 8. áratugarins til New York. Þar lauk hann meistaranámi í myndlist frá Brooklyn College og hefur síðan búið og starfað sem myndlistarmaður í New York. Hann hefur haldið og tekið þátt í fjölda sýninga víða um heim. Undanfarin ár hefur hann tekið þátt í gestavinnustofum og dvalið í gestaíbúðum hluta úr ári í jafnólíkum stöðum og Noregi og Sambíu. Hann dvelur um þessar mundir í gestaíbúðinni að Skriðuklaustri. Sýning hans stendur til 16. september og er opin kl. 12-17, á opnunartíma hússins.