Opnuð hefur verið ný sýning í gallerí Klaustri. Það er Kristín Rut Eyjólfsdóttir frá Egilsstöðum sem sýnir þar 50 litlar myndir. Þeim er fylgt úr hlaði með þessu ljóði:

Litirnir streyma yfir hvítan strigann / fullir af lífi og vekja hann úr dvala / líkt og vorregnið sem kemur með sunnanvindinum / leysir land og lýð úr fjötrum vetrar.

Sýningin er opin alla daga kl. 10-18 og stendur til 19. júní.

Sumarið er svo sannarlega komið í Fljótsdalnum. Sól og sunnanvindur upp á hvern dag. Lækir og ár hafa vart undan að bera bráðinn snjó úr fjöllum. Á Skriðuklaustri er nú opið alla daga kl. 10-18. Minjasvæðið er orðið grænt og fyrsti sláttur á flötinni sunnan við Gunnarshús verður í vikunni. Útiborðin verða klár á suðurveröndinni fyrir helgi.

Joan Perlman, sem dvelst um þessar mundir í gestaíbúðinni Klaustrinu með styrk frá The American-Scandinavian Foundation, opnaði sýningu í gallerí Klaustri laugardaginn 18. maí. Á henni getur að líta nokkrar myndir unnar með gouache á Yupo úr stærra myndverki sem hún nefnir Sanctuary. Innblástur í verk sín sækir Joan í íslenskar jökulár og hefur hún unnið með árnar síðustu tíu árin bæði í vídeóverkum og málverkum. Sýningu Joan lýkur 1. júní. Heimasíða Joan Perlman

Á fæðingardegi Gunnars skálds, 18. maí, var opnuð lítil sýning sem er hluti af verkefni sem Árnastofnun efnir til í tilefni þess að 350 ár eru liðin frá fæðingu Árna Magnússonar. Liður í því er að sýna eftirgerðir sex valinkunnra handrita sem næst þeim stað sem Árni fékk þau frá. Margrétar saga kom í hlut Gunnarsstofnunar því að hún var send frá Skriðuklaustri til Kaupmannahafnar árið 1704. Vigdís Finnbogadóttir er "fóstra" handritsins í sýningarverkefninu og kom ásamt fríðu föruneyti frá Árnastofnun færandi hendi með eftirgerðina sem komið var fyrir í sýningarstandi í stássstofunni á Klaustri. Hægt er að sjá fleiri myndir og myndband frá móttöku Margrétar sögu á Fésbókarsíðu Skriðuklausturs.