Gunnar Gunnarsson var fæddur á Valþjófsstað og bjó í Fljótsdal fyrstu sjö ár ævinnar. Þegar honum bauðst sumarið 1938 að kaupa Skriðuklaustur, næstu jörð við fæðingarstaðinn, var ekkert hik á honum eins og stuttort skeyti til Klausturbóndans frá 25. júlí 1938 sýnir: „Kaupi. Okkur mun semjast.“
Skriðuklaustur er kostajörð og það voru fleiri sem vildu kaupa en skáldið hreppti jörðina að lokum. Skrifað var undir afsal 27. ágúst 1938. Kaupverðið var 22.300 kr. og þar af voru áhvílandi lán upp á 17.800 kr. Fasteignamat jarðarinnar var á þessum tíma 24.400 kr. Húsakostur á Klaustri var ágætur en ekki við hæfi heimsborgara. Hugur Gunnars stóð til þess að flytja strax heim í Fljótsdalinn og gerast stórbóndi með mörg hundruð fjár. Hann gerði sjálfur skissu að íbúðarhúsi og fékk Jóhann Fr. Kristjánsson, sem teiknað hafði Húsmæðraskólann á Hallormsstað, til að útfæra teikninguna. En fljótlega frétti vinur hans, þýski arkitektinn Fritz Höger, af því hvað til stóð og bauðst til að teikna fyrir hann herragarð. Gunnar átti fund með honum ásamt Jóhann í Hamborg í apríl 1939 og þar voru línurnar lagðar. Þaðan hélt Gunnar með teikningar að stórhýsi í sönnum herragarðsstíl.
