Skriðuklaustur nefnist bær og jörð í Fljótsdal sem liggur á milli hinna fornu höfuðbóla, Valþjófsstaðar og Bessastaða. Staðurinn hét upphaflega Skriða en þar var stofnað munkaklaustur undir lok 15. aldar. Var það eina klaustrið á Austurlandi og jafnframt hið síðasta sem stofnað var í kaþólskum sið. Nú er staðurinn þekktastur fyrir hið einstæða stórhýsi sem Gunnar Gunnarsson skáld reisti þar sumarið 1939 og gaf íslenska ríkinu 1948 til ævarandi eignar. Þar er nú rekið menningar- og fræðasetur með starfsemi allan ársins hring. Árið 2010 var einnig opnuð gestastofa fyrir austursvæði Vatnajökulsþjóðgarðs skammt frá Gunnarshúsi og heitir hún Snæfellsstofa.