Tvær sýningar verða opnaðar á Skriðuklaustri á pálmasunnudag, 1. apríl. Annars vegar er það sýningin Flæði í gallerí Klaustri sem er unnin af Ólöfu Björk Bragadóttur (Lóa) í samvinnu við Sigurð Ingólfsson ljóðskáld. Lagarfljótið og litaspil þess er uppspretta hugmynda að verkinu Flæði og þeim málverkum sem Lóa sýnir.  Hin sýningin er um Lagarfljótsorminn og var áður sett upp sumarið 2007 en gengur nú í endurnýjun lífdaga í kjölfar heimsfrægðar ormsins í netheimum. Opið verður um páskana á Skriðuklaustri á sýningar og í hádegisverð og kaffihlaðborð hjá Klausturkaffi sem hér segir: Kl. 12-17 á pálmasunnudag, föstudaginn langa, laugardaginn 7. apríl og á annan í páskum. Lokað á skírdag og páskadag. Árleg píslarganga Gunnarsstofnunar í samvinnu við prestana á Héraði verður frá Valþjófsstaðarkirkju í Skriðuklaustur á föstudaginn langa kl. 11. Snæfellsstofa verður einnig opin laugardaginn 7. apríl og á annan í páskum.

Leikhópurinn Aldrei óstelandi frumsýndi sl. föstudag nýtt leikverk sem m.a. byggir á Svartfugli Gunnars Gunnarssonar. Verkið ber heitið Sjöundá og er sýnt í Kúlunni í Þjóðleikhúsinu. Leikendur eru stofnendur leikhópsins, þau Sveinn Ólafur Gunnarsson, Edda Björg Eyjólfsdóttir, Stefán Hallur Stefánsson og Harpa Arnardóttir. Leikstjóri er Marta Nordal.

Sunnudaginn 19. febrúar verður opið á Skriðuklaustri kl. 14-17. Skúli Björn mun segja frá snjallleiðsögn um Héraðið, verkefni sem Hrafnkelufélagið hefur haft forystu um í samstarfi við Locatify. Erindi hans hefst kl. 14. Klausturkaffi býður upp á konudagskaffi með bolludagsívafi.

Gunnarsstofnun óskar öllum gleðilegs árs. Fyrsta lomberkvöld ársins 2012 verður haldið á Skriðuklaustri föstudaginn 13. janúar. Spilamennska hefst að venju kl. 20.00 og eru allir velkomnir, jafnt byrjendur sem snillingar.